គបផក ផ្សព្វផ្សាយច្បាប់ពាក់ពន្ធ័ និង ផលិតផលក្លែងក្លាយ ដែលបង្កគ្រោះថ្នាក់ មានហានិភ័យខ្ពស់ ដល់សុខភាពនិងសុវត្ថិភាពសង្គម ជូនដល់ជូនដល់ម្ចាស់អាជីវកម្មពាក់ពន្ធ័ជាង៥០០នាក់..

 

ដើម្បីលើកកំពស់ យល់ដឹងបន្ថែម ពីផលប៉ះពាល់ និងគោលការណ៍ច្បាប់ពាក់ព័ន្ធនានា នៃផលិតផលក្លែងក្លាយ (គបផក) បានសហការ ជាមួយសមាគមសហពន្ធ័ការពារអ្នកប្រើប្រាស់នៅកម្ពុជា និងសមាគមសហពន្ធ័វិនិយោគិនកម្ពុជា បានធ្វើការផ្សព្វផ្សាយច្បាប់ពាក់ពន្ធ័របស់កម្ពុជា និង ផលិតផលក្លែងក្លាយដែលបង្កគ្រោះថ្នាក់ មានហានិភ័យខ្ពស់ ដល់សុខភាពនិងសុវត្ថិភាពសង្គម ជូនដល់ថ្នាក់ដឹកនាំ មកពីវិស័យ វិនិយោគិនពាណិជ្ជករ ឧស្សា ហករ សិប្បករ អាជីវករ អគ្គនាយក នាយកប្រតិបត្តិ អ្នកគ្រប់គ្រងទូទៅ ម្ចាស់ក្រុមហ៊ុន រោងចក្រសហគ្រាស សិប្បកម្ម ម្ចាស់អាជីវកម្មក្នុងវិស័យចំណីអាហារ កសិកម្ម ឱសថ ផលិតផលគ្រឿងសំអាង និងម្ចាស់ផលិតតាមវិស័យតាមផ្នែក ជាង៥០០នាក់។

ពិធីនេះ បានធ្វើឡើងនៅរសៀលថ្ងៃទី ២១ ខែតុលា ឆ្នាំ២០២៥  ក្រោមអធិបតីភាព ឯកឧត្តម នៅ លក្ខណា រដ្ឋលេខាធិការ ក្រសួងមហាផ្ទៃ និង ជាប្រធាន គណៈកម្មការ ប្រយុទ្ធប្រឆាំងផលិតផលកន្លែងក្លាយ ដែលបង្កគ្រោះ ថ្នាក់ មានហានីភ័យខ្ពស់ ដល់សុខភាពនិងសុវត្ថិភាពសង្គម (គបផក)។

ឧកញ៉ាសាស្ត្រាចារ្យសមូហកបណ្ឌិត ឡី សុភាព ប្រធានសមាគមសហព័ន្ធវិនិយោគិនកម្ពុជានិងជាប្រធានសមាគមសហព័ន្ធការពារអ្នកប្រើប្រាស់នៅកម្ពុជា
បានចាត់ទុកពិធីនេះ ជាសក្ខីភាពបង្ហាញពីការយកចិត្តទុកដាក់ ពីបញ្ហាសុខភាពរបស់អ្នកប្រើប្រាស់ ពីសំណាក់ គបផក ដែលជាសេនាធិការរបស់រាជរដ្ឋាភិបាល។ 

យ៉ាងណា បើតាមការសន្និដ្ឋាន របស់
ឧកញ៉ាសាស្ត្រាចារ្យ សមូហកបណ្ឌិត ឡី សុភាព ម្ចាស់ក្រុមហ៊ុន រោងចក្រ សហគ្រាស សិប្បកម្ម និងម្ចាស់ផលិតផលទាំងអស់ យល់ច្បាស់អំពី ផលិតផល ខូចគុណភាព ដែលបង្កគ្រោះថ្នាក់ មានហានិភ័យខ្ពស់ ដល់សុខភាព និងសុវត្ថិភាពសង្គម នោះពួកគាត់ និងចូលរួមពង្រឹងគុណភាព សុវត្ថិភាព លើផលិតផល ស្របទៅនឹងយុទ្ធសាស្ត្រ បញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ដែលមាន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជា ណាចក្រកម្ពុជា កាច់ចង្កូតនាវាកម្ពុជា ឆ្ពោះទៅចក្ខុវិស័យ ឆ្នាំ២០៥០ ជាប្រទេសមានចំណូលខ្ពស់។

ទោះយ៉ាងណាក្តី ឧកញ៉ាសាស្ត្រាចារ្យសមូហកបណ្ឌិត ឡី សុភាព ក្រៅពីបានលើកឡើងពីសកម្មភាព ការងារដែលសមាគមបានអនុវត្តកន្លងមក ..តាមរយះពិធីនេះបានសំណូមពរដល់ គណៈ កម្មការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់មានហានិភ័យខ្ពស់ ដល់សុខភាព និងសុវត្ថិភាពសង្គម សមាគមសហព័ន្ធវិនិយោគិនកម្ពុជា សមាគមសហព័ន្ធការពារអ្នកប្រើប្រាស់នៅកម្ពុជា និងក្រសួង ស្ថាប័ន អង្គភាពដែលពាក់ព័ន្ធ ត្រូវបន្តធ្វើការផ្សព្វផ្សាយឱ្យបានជ្រួតជ្រាប។ បន្តធ្វើការបណ្តុះបណ្តាលដល់រូបវន្តបុគ្គល នីតិបុគ្គល អ្នកផ្គត់ផ្គង់ និងអ្នកប្រើប្រាស់ ឱ្យយល់ដឹង អំពីរបៀបរបបនៃការចុះបញ្ជីផលិតផល។
បន្តធ្វើការផ្សព្វផ្សាយដល់ ខេត្ត ក្រុង ស្រុក ខណ្ឌ និងតាមក្រសួង ស្ថាប័ននានា ដែលពាក់ព័ន្ធ និងសំណូមពរដល់ គណៈកម្មការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់មានហានិភ័យខ្ពស់ដល់ សុខភាព និងសុវត្ថិភាពសង្គម ពង្រឹង និងអនុវត្តច្បាប់ចំពោះបុគ្គល ឬក្រុមហ៊ុនដែលមិនសហការគោរពច្បាប់។

បើតាមប្រសាសន៍ ឯកឧត្តម នៅ លក្ខណា ÷  កត្តាសំខាន់ នៃការលំបាក ក្នុងការទប់ស្កាត់ផលិតផលក្លែងក្លាយ គឺការមិនបានផ្សព្វផ្សាយ និងពន្យល់ណែនាំឲ្យច្បាស់ ដល់ប្រជាពលរដ្ឋព្រោះថា ប្រសិនបើប្រជាពលរដ្ឋយល់ច្បាស់ ពីផលប៉ះពាល់នៃផលិផលក្លែងក្លាយ មិនត្រឹមតែខ្លួនគាត់ផ្ទាល់បញ្ឈប់ ការប្រើប្រាស់ប៉ុណ្ណោះទេ តែពួកគាត់គឺជាអ្នកផ្សព្វផ្សាយបន្ដដ៏មានឥទ្ធិពល ទៅដល់អ្នកដទៃទៀត ក្នុងការបញ្ឈប់ការប្រើប្រាស់ ផលិតផលក្លែងក្លាយ។ ក្នុងន័យនេះ ឯកឧត្តមថា  អ្នកផ្ដល់ឲ្យគេប្រើប្រាស់ មុននឹងផ្ដល់ផលិតផលឲ្យគេប្រើប្រាស់ តើផលិតផលទាំងនោះបានផ្ដល់ផលប៉ះពាល់ ដល់គេឬទេ? តែបើគិតតែផលចំណេញរបស់ខ្លួនឯង តែមិនគិតពីផលប៉ះពាល់នៃការប្រើប្រាស់ របស់អ្នកដទៃនេះទើបជាបញ្ហាធំ ដែលត្រូវចេះស្វែងយល់ និងភ្ញាក់រលឹកដោយខ្លួន​ឯង ដូច្នេះប្រសិនបើដល់ដំណាកកាលបែបនេះ ត្រូវតែអប់រំ ប្រសិនបើអប់រំមិនបានទេ ត្រូវអនុវត្តន៍ច្បាប់។

ក្នុងនោះផងដែរ ឯកឧត្តម នៅ លក្ខណា ក្រៅពីថ្លែងអំណរគុណ ឧកញ៉ាសាស្ត្រាចារ្យសមូហកបណ្ឌិត ឡី សុភាព ដែលបានដឹកនាំធ្វើសកម្មភាពយ៉ាងផុលផុសកន្លងមក ដែលជាទិសដៅរួម របស់ គ.ប.ផ.ក ក្នុងការទប់ស្កាត់ផលិតផលក្លែងក្លាយ និងចំណីអាហារខួចគុណភាពនោះ ក៏បានអំពាវនាវបន្ថែម ជាថ្មីទៀត ដល់សាធារណៈជនទាំងអស់ ជាពិសេសម្ចាស់អាជីវកម្មគ្រប់ប្រភេទ សូមចូលរួមគោរពច្បាប់ឱ្យម៉ឹងម៉ាត់ ចៀសវាងប្រឈមទោសទណ្ឌ និងចូលរួមសហការទាំងអស់គ្នា បង្កា ទប់ស្កាត់ ការផលិត ការនាំចូល ការស្តុកទុក ការចែកចាយ ការលក់ផលិតផលទាំងឡាយណាដែលខុសទៅនឹងច្បាប់ ជាពិសេសផលិតផលក្លែងក្លាយ ចំណីអាហារផ្ទុកសារធាតុគីមីលើសកម្រិត និងឱសថគ្មានសុវត្ថិភាពជាដើម ដើម្បីរួមគ្នាការពារឱ្យបាននូវសុខភាពសាធារណៈ សេដ្ឋកិច្ចគ្រួសារ សេដ្ឋកិច្ចជាតិ និងសុវត្ថិភាពសង្គមរបស់យើងទាំងអស់គ្នា៕